A Xunta destaca que os 40 anos de integración europea transformaron a economía e a sociedade galegas e reclama manter a cohesión territorial no novo marco financeiro
Santiago de Compostela, 25 de setembro de 2026.– Galicia afronta unha nova etapa dentro da Unión Europea con importantes retos e oportunidades, tras catro décadas de transformación impulsada, en boa medida, pola integración europea e polos fondos comunitarios. A Xunta reivindica o papel destes recursos e reclama que o futuro marco financeiro europeo manteña como prioridades a cohesión económica, social e territorial e o apoio ás políticas agraria, rural, marítima e pesqueira.
O conselleiro de Facenda e Administración Pública, Miguel Corgos, abordou estas cuestións durante a súa participación na mesa redonda celebrada no marco da xornada Ribadeo, 40 anos sendo Europa. Durante o encontro, destacou os cambios experimentados pola Comunidade galega desde a súa entrada na Comunidade Europea, en ámbitos como a economía, a formación, o emprego ou a esperanza de vida.
Segundo explicou, o PIB por habitante de Galicia pasou de representar aproximadamente entre o 65 % e o 70 % da media europea a situarse arredor do 85 %. Tamén aumentou notablemente a porcentaxe de mozos con estudos superiores, que pasou do 8-10 % a preto do 50 %, mentres que a taxa de actividade feminina avanzou desde o 40 % ata superar o 50 %. Pola súa banda, a esperanza de vida incrementouse dos 76 aos 84 anos.
Os fondos europeos como instrumento de planificación
Corgos salientou que os fondos europeos non só permitiron financiar proxectos e investimentos, senón que tamén introduciron novas formas de planificación e xestión pública. Neste sentido, destacou a importancia da planificación a medio prazo, dos obxectivos compartidos entre administracións, dos indicadores e dos sistemas de seguimento e avaliación.
O conselleiro advertiu, con todo, de que Galicia debe participar activamente na definición das futuras políticas europeas e non limitarse á execución dos recursos unha vez aprobados.
Neste contexto, defendeu que a Comunidade galega debe ter presenza no proceso de decisión sobre que políticas se financian, con que recursos e baixo que modelo de gobernanza, co obxectivo de que as especificidades territoriais sexan tidas en conta no deseño das políticas comunitarias.
O futuro marco financeiro, unha oportunidade para Galicia
A definición do próximo Marco Financeiro Plurianual europeo prodúcese nun contexto marcado por novos desafíos para a Unión Europea, entre eles a perda de competitividade, as tensións comerciais e as novas prioridades orzamentarias.
Ante esta situación, a Xunta considera necesario garantir que estas novas prioridades non vaian en detrimento da cohesión económica, social e territorial nin do papel das rexións.
Especial relevancia teñen, segundo Corgos, as políticas relacionadas co sector agrario e rural e co ámbito marítimo e pesqueiro. O futuro dos fondos europeos, sinalou, terá consecuencias directas sobre cuestións como a modernización das explotacións, a actividade das comunidades costeiras, a atención ás persoas maiores, o apoio ás empresas innovadoras ou a capacidade dos territorios para xerar emprego.
Innovación e cohesión, dous obxectivos complementarios
O responsable de Facenda defendeu que Galicia debe afrontar a nova etapa europea avanzando simultaneamente en dous ámbitos.
Por unha banda, deberá adaptarse ás novas prioridades comunitarias, entre as que citou a innovación, a intelixencia artificial, a biotecnoloxía, as tecnoloxías limpas, a enerxía, a resiliencia hídrica, a vivenda e a autonomía estratéxica.
Por outra, considerou necesario preservar os principios de cohesión que están na base do proxecto europeo, especialmente o obxectivo de evitar que o lugar de residencia determine as oportunidades das persoas.
Esta cuestión ten unha importancia particular para Galicia pola súa estrutura territorial, o peso do medio rural e do litoral e os desafíos vinculados á evolución demográfica.
A Xunta defende así unha participación activa de Galicia no deseño das futuras políticas europeas, combinando a adaptación ás novas prioridades da Unión coa defensa dos instrumentos destinados a garantir a cohesión territorial e a igualdade de oportunidades.
