A conselleira de Política Social e Igualdade destaca o apoio da Xunta ao emprendemento feminino, con 5 millóns de euros anuais, e a creación de referentes para as novas xeracións
Vigo, 1 de outubro de 2026.– A conselleira de Política Social e Igualdade, Fabiola García, defendeu este mércores a igualdade de xénero como un factor clave para o crecemento económico e a xeración de oportunidades en Galicia. García pronunciouse así durante a clausura do VI Foro Empresarial pola Igualdade, organizado pola Confederación Empresarial de Pontevedra (CEP) baixo o lema Do compromiso ao valor económico.
Durante a súa intervención, a conselleira sinalou que a igualdade entre mulleres e homes vai máis alá dunha cuestión de xustiza ou responsabilidade social e ten tamén unha dimensión económica. Segundo explicou, a eliminación das barreiras que aínda dificultan a participación plena das mulleres permite aproveitar mellor o talento, o coñecemento e as capacidades do conxunto da sociedade.
Neste sentido, García reivindicou que a igualdade debe ser entendida como un investimento no desenvolvemento económico e no futuro de Galicia. A responsable autonómica destacou, ademais, a necesidade de impulsar o talento feminino e de ofrecer referentes en diferentes ámbitos profesionais para que as nenas e mozas poidan ampliar as súas expectativas de futuro.
Entre as iniciativas impulsadas pola Xunta, a conselleira destacou a Plataforma Presentes, que xa reúne máis de 2.000 profesionais galegas. Tamén puxo en valor as charlas Inspirando Presentes, que percorrerán diferentes puntos da comunidade co obxectivo de visibilizar o talento das mulleres galegas e achegar referentes ás novas xeracións.
5 millóns de euros anuais para o emprendemento feminino
No ámbito empresarial, Fabiola García reafirmou o compromiso da Xunta para incrementar a presenza das mulleres no emprendemento e no tecido empresarial galego. Para iso, o Goberno autonómico destina 5 millóns de euros anuais ao apoio de proxectos empresariais promovidos por mulleres.
Estas axudas están orientadas tanto á posta en marcha como á consolidación de iniciativas empresariais lideradas por mulleres. A esta liña de actuación súmanse outras medidas destinadas a facilitar a conciliación e avanzar na corresponsabilidade, dous elementos que a Xunta considera fundamentais para favorecer a participación feminina no mercado laboral e no desenvolvemento empresarial.
O foro contou coa participación de empresarias galegas de diferentes sectores e serviu para analizar o impacto da igualdade no ámbito económico e laboral.
A apertura da xornada correu a cargo da secretaria xeral de Emprego e Relacións Laborais, Susana Pérez Iglesias, quen destacou o compromiso do Goberno galego coa igualdade de oportunidades no mercado laboral.
Pérez Iglesias referiuse tamén á futura Estratexia galega de emprego feminino en sectores masculinizados, actualmente en elaboración coa participación de mulleres con diferentes perfís profesionais e no marco do Diálogo Social.
Ademais, presentou o Campus en liña de igualdade laboral, unha plataforma de formación gratuíta destinada á sensibilización e capacitación en materia de igualdade efectiva no ámbito do traballo.
