
A Coruña, 17 de novembro de 2026.– O director xeral de Maiores e Atención Sociosanitaria, Antón Acevedo, participou esta mañá no acto de inauguración do curso académico 2026-2027 das Aulas Senior de Galicia, unha iniciativa promovida pola Asociación Cultural Galega de Formación Permanente (Ategal) para fomentar a aprendizaxe ao longo da vida e a participación activa das persoas maiores na sociedade.
Durante o acto, Acevedo puxo en valor o compromiso de Ategal coa formación permanente e co impulso dun envellecemento activo e saudable, destacando o papel da entidade como referente na promoción de oportunidades de aprendizaxe e participación social para as persoas maiores.
O representante da Xunta felicitou tamén o alumnado das Aulas Senior polo seu interese por continuar adquirindo coñecementos, manterse activo intelectualmente e afrontar novas aprendizaxes, independentemente da idade.
Así mesmo, reafirmou o compromiso do Goberno galego de continuar promovendo iniciativas que favorezan a autonomía persoal, o benestar e a participación das persoas maiores, contribuíndo a construír unha sociedade máis inclusiva e comprometida co envellecemento activo.
