Begoña Abeijón salienta o compromiso do Goberno galego coa inclusión durante a inauguración das XIV Marchas Ciclistas Unificadas de Special Olympics Galicia en Monforte
Monforte de Lemos (Lugo), 1 de outubro de 2026.– A directora xeral de Persoas con Discapacidade, Begoña Abeijón, destacou este xoves en Monforte de Lemos o papel do deporte adaptado como unha ferramenta fundamental para favorecer a integración social e a autonomía das persoas con discapacidade.
A representante da Xunta participou no acto de inauguración das XIV Marchas Ciclistas Unificadas de Special Olympics Galicia, celebrado no campo de fútbol da Pinguela, onde puxo de manifesto o compromiso do Goberno galego coa plena inclusión das persoas con discapacidade.
Durante a súa intervención, Abeijón lembrou que a Xunta leva anos impulsando programas e iniciativas destinados a promover a inclusión e a participación activa deste colectivo na sociedade. Neste contexto, sinalou a colaboración existente con Special Olympics Galicia, que se desenvolve a través de diferentes convenios por un importe superior aos 300.000 euros, ademais doutras achegas destinadas a programas financiados con cargo ao 0,7 % do IRPF.
A directora xeral tamén puxo en valor o traballo desenvolvido polas entidades sociais especializadas no ámbito da discapacidade, ás que atribuíu un papel esencial para chegar ás persoas que necesitan apoio e facilitar a súa participación en diferentes ámbitos da vida social.
Neste sentido, destacou a importancia do deporte adaptado como vía para promover a igualdade de oportunidades, reforzar a autonomía persoal e contribuír á construción dunha Galicia máis inclusiva.
Finalmente, Begoña Abeijón trasladou os seus parabéns a todas as persoas participantes nas Marchas Ciclistas Unificadas, ás que cualificou como un exemplo de esforzo, superación e participación, e salientou a capacidade do deporte para favorecer a integración de todas as persoas na sociedade.
