Rianxo. O BNG de Rianxo denuncia a situación que atravesa o Centro de Saúde da localidade, sinalando as dificultades que afectan á atención sanitaria que recibe a veciñanza. O concelleiro nacionalista Fran Rei puxo o foco nas deficiencias existentes no centro, entre elas as longas listas de agarda e outros problemas que, segundo a formación, repercuten directamente na calidade do servizo público.
Á situación asistencial súmase a problemática que están a vivir as traballadoras do servizo de limpeza dos centros de saúde de Rianxo, Boiro e Ribeira. Trátase dun servizo externalizado polo SERGAS cuxas traballadoras, segundo denuncia o BNG, están a sufrir atrasos no cobro das nóminas e o impago das pagas extras.
Desde a formación nacionalista reclámase unha resposta que permita solucionar estas situacións e garantir tanto unha atención sanitaria adecuada como o cumprimento das condicións laborais das traballadoras.
O BNG sinala que continuará presentando iniciativas para reclamar solucións e manifesta o seu apoio á veciñanza e ás traballadoras na defensa dunha sanidade pública con recursos suficientes e unhas condicións laborais xustas.
