Responsables da Axencia Española de Protección de Datos, do Consello Xeral do Poder Xudicial e do Colexio de Enxeñaría Informática participarán na formación, centrada nos aspectos técnicos, xurídicos e prácticos da protección de datos.
Santiago de Compostela, 13 de outubro de 2026.– Un total de 70 persoas empregadas públicas participan desde hoxe no Curso Superior sobre Protección de Datos, organizado pola Escola Galega de Administración Pública (EGAP) e dirixido pola Axencia para a Modernización Tecnolóxica de Galicia (Amtega).
A formación busca afondar nos coñecementos sobre protección de datos no ámbito da Administración pública, combinando os aspectos técnicos e xurídicos cunha perspectiva práctica. Para iso, contará coa participación de responsables e especialistas da Axencia Española de Protección de Datos, do Consello Xeral do Poder Xudicial e do Colexio de Enxeñaría Informática, entre outras entidades.
Durante o acto de apertura, celebrado esta tarde, o director da Amtega, Damián Rey, subliñou a importancia da protección dos datos persoais e da ciberseguridade no proceso de modernización tecnolóxica e dixitalización da Administración galega.
Rey salientou que as administracións públicas custodian unha gran cantidade de información da cidadanía e teñen a responsabilidade de garantir a súa seguridade e o seu uso adecuado. Neste sentido, destacou tamén a importancia de ofrecer ao persoal empregado público a información e a formación necesarias para afrontar estes retos con garantías.
O programa do curso inclúe contidos relacionados co marco normativo da protección de datos, os roles e as responsabilidades das administracións públicas, os dereitos da cidadanía, as autoridades de supervisión e o réxime sancionador.
A actividade formativa desenvolverase durante os meses de outubro e novembro e combinará unha sesión presencial inicial con sesións remotas, co obxectivo de facilitar unha formación especializada e adaptada ás necesidades do persoal da Administración.
