A Plataforma Salvemos a Ruña denuncia a desconexión entre os discursos electorais e a realidade que sofre o noso territorio.
Esta fin de semana, Ana Pontón interveu na SER para pronunciar unha desas frases recorrentes na política en vésperas electorais: «O BNG vai estar sempre para defender, ante todo e ante todos, aos galegos e galegas».
Mais, á vista da situación da Ruña, cabe preguntarse se esa defensa é realmente para todo o mundo. Porque, se así fose, habería que engadir unha excepción dolorosa: «aos galegos e galegas, menos aos da Ruña».
Desde Salvemos a Ruña consideramos decepcionante esta actitude e reclamamos que a defensa de Galicia e do seu territorio se demostre con feitos, non só con palabras. Cando a protección dunha contorna ameazada queda fóra das prioridades políticas, o discurso perde credibilidade e medra a desafección cidadá.
Por iso lle dicimos a Ana Pontón: chega de declaracións baleiras. A Ruña precisa compromisos claros, respostas e actuacións concretas. A defensa do país tamén pasa por escoitar as persoas que loitan pola conservación do seu territorio.
Pero a polémica non remata aquí. O alcalde de Mazaricos, nunha entrevista publicada por La Voz de Galicia, anuncia a súa intención de abandonar a primeira liña política, ao tempo que apunta á continuidade do seu proxecto a través dun sucesor. Un cambio de nomes non pode servir para ocultar a continuidade das políticas que cuestionamos.
A Ruña non precisa continuismo: precisa un cambio real de rumbo. O que está en xogo é a protección do territorio e a defensa do patrimonio natural fronte a actuacións que a Plataforma considera unha ameaza ambiental de enorme gravidade.
Hai, ademais, unha cuestión simbólica que non queremos deixar pasar: nin Ana Pontón nin o alcalde parecen ter atopado o momento de pronunciarse con toda a contundencia que merece a defensa da Ruña. Porque defender un lugar tamén significa nomealo, recoñecelo e comprometerse publicamente coa súa protección.
Desde a Plataforma Salvemos a Ruña seguiremos esixindo responsabilidades, transparencia e medidas efectivas para evitar a destrución da nosa contorna. Non aceptamos que os intereses do territorio queden subordinados ás estratexias electorais nin que a continuidade política se presente como a única alternativa posible.
A Ruña merece respecto. Galicia merece coherencia. E o noso territorio merece ser defendido con feitos.
A LOITA CONTINÚA! SALVEMOS A RUÑA, SALVEMOS O PAÍS!
