Os populares poñen en valor as partidas previstas nos orzamentos autonómicos de 2027 e reclaman que repercutan no municipio, ao tempo que critican a xestión do goberno local do PSOE.*
O Partido Popular de Camariñas destaca os investimentos previstos nos orzamentos da Xunta de Galicia para 2027 que, segundo sinala a formación, permitirán avanzar en melloras educativas, reforzar os servizos sociais e impulsar infraestruturas importantes para a Costa da Morte.
No ámbito educativo, os populares salientan a dotación de 400.000 euros para completar a actuación no CEIP O Areal, un investimento que, segundo lembran, fora cuestionado polo PSOE hai un ano. Ademais, os orzamentos recollen unha partida de 70.347 euros para a instalación dun ascensor no CEIP Ponte do Porto, co obxectivo de mellorar a accesibilidade do centro.
En materia social, o PP subliña o incremento do gasto da Xunta, con máis recursos para o Bono Coidado no Fogar e un maior financiamento do Servizo de Axuda no Fogar. A formación considera que estas medidas reforzan o compromiso coa atención ás persoas maiores e dependentes. Neste sentido, lembra que Camariñas conta xa con tres Casas do Maior financiadas pola Xunta de Galicia, unha delas de recente apertura, que achegan servizos de atención e coidados á poboación do rural.
No apartado das infraestruturas, os populares destacan a consignación de 7,8 millóns de euros para continuar as obras da Vía de Altas Prestacións (VAC) da Costa da Morte. Unha partida que, segundo o PP local, permitirá seguir avanzando nunha infraestrutura estratéxica para as comunicacións e o desenvolvemento da comarca.
A formación tamén sinala que os orzamentos autonómicos contemplan fondos e liñas de financiamento dos que se benefician os concellos, polo que considera importante que Camariñas aproveite ao máximo as oportunidades de investimento dispoñibles.
Desde o PP de Camariñas reivindican a aprobación dos orzamentos como unha ferramenta necesaria para planificar actuacións e garantir recursos públicos. Neste sentido, contrastan a política orzamentaria do Partido Popular coa situación do Goberno central, presidido por Pedro Sánchez, e coa xestión do executivo municipal de Sandra Insua.
«Non somos conformistas e traballaremos para que estes orzamentos repercutan o máximo posible no noso municipio», sinalan os populares, que tamén critican o que consideran un baixo investimento por habitante do goberno local socialista en comparación con outros concellos da comarca.
O PP de Camariñas conclúe reclamando que os recursos previstos pola Xunta se traduzan en melloras concretas para a veciñanza, tanto nos centros educativos como nos servizos sociais e nas infraestruturas, e asegura que continuará esixindo investimentos e resultados para o municipio.
