A primeira fase da folga convocada polo sindicato Médicos Unidos (SMU) prolongarase ata o 28 de novembro. A Xunta establece servizos mínimos para garantir a atención urxente, os tratamentos inaplazables e os procesos asistenciais prioritarios.
A folga convocada polo sindicato Médicos Unidos (SMU), dirixida ao persoal médico do sistema público de saúde, comezará o próximo luns 16 de novembro en Galicia. Esta primeira fase da mobilización estenderase ata as 8.00 horas do sábado 28 de novembro.
Ante esta convocatoria, a Xunta de Galicia vén de establecer os servizos mínimos para garantir a asistencia sanitaria durante os días de paro. Segundo recolle a orde publicada este venres no Diario Oficial de Galicia (DOG), manterase o 100% da actividade urxente tanto nos hospitais como nos servizos extrahospitalarios.
No ámbito hospitalario, os servizos mínimos contemplan a cobertura íntegra das urxencias e gardas médicas, os quirófanos para intervencións inaprazables, as salas de partos e os laboratorios de urxencias.
Tamén se garantirá a actividade nas unidades de reanimación, coidados intensivos de adultos e pediátricos, unidades coronarias, diálise, tratamentos oncolóxicos e transplantes.
A orde establece igualmente a continuidade das intervencións cirúrxicas daqueles pacientes cuxas patoloxías poidan poñer en perigo a súa vida ou empeorar o seu estado de saúde se a operación se demora, con especial atención aos procesos oncolóxicos.
Nas unidades de hospitalización deberá haber polo menos un facultativo por unidade médica ou cirúrxica, cunha dotación de entre un e catro profesionais segundo as dimensións de cada servizo.
ATENCIÓN PRIMARIA E EMERXENCIAS
En atención primaria, garantirase o 100% da actividade urxente nos puntos de atención continuada (PAC). Nos centros de saúde manterase a asistencia ás situacións urxentes ou inaprazables, cun mínimo de entre un e catro médicos de familia en función do persoal adscrito a cada centro.
A atención pediátrica urxente tamén estará garantida mediante a presenza dun pediatra por centro ou zona de referencia.
Pola súa banda, o servizo do 061 contará co persoal necesario para asegurar o 100% da atención urxente permanente e das emerxencias sanitarias.
GARANTIDOS OS TRATAMENTOS INAPRAZABLES
Os servizos mínimos inclúen tamén as consultas urxentes e preferentes, as probas complementarias necesarias para os pacientes hospitalizados e os tratamentos que non poden demorarse, especialmente no caso dos pacientes oncolóxicos.
Así mesmo, manterase a atención aos pacientes ingresados, as altas clínicas, os coidados paliativos e a hospitalización a domicilio. Tamén se garantirá a subministración de sangue, medicamentos e produtos sanitarios imprescindibles.
A orde contempla ademais a actividade correspondente aos pacientes con indicación cirúrxica de prioridade 1 e aos procesos incluídos nos prazos máximos de acceso garantidos: menos de 30 días para as intervencións de prioridade 1 e menos de 60 días para os demais procesos garantidos.
A convocatoria do sindicato Médicos Unidos ten carácter indefinido e desenvolverase por fases sucesivas. A primeira comezará o 16 de novembro e finalizará o día 28, nunha mobilización que afectará ao funcionamento ordinario do sistema sanitario público galego, aínda que coa actividade esencial protexida polos servizos mínimos establecidos pola Xunta.
