Unha persoa resultou ferida de consideración tras sufrir unha saída de vía co seu vehículo no quilómetro 6,5 da estrada AC-453, no termo municipal de Ames.
O accidente mobilizou os servizos de emerxencia, ata o lugar desprazáronse efectivos de Protección Civil de Ames, a Garda Civil de Tráfico, persoal sanitario do 061 e o Grupo de Emerxencias Supramunicipal (GES) de Brión.
Os efectivos do GES de Brión tiveron que intervir para liberar á persoa ferida, que permanecía atrapada no interior do vehículo. Unha vez excarcerada, foi atendida polos servizos sanitarios e trasladada nunha ambulancia ao Complexo Hospitalario Universitario de Santiago (CHUS).
Polo momento, non transcenderon máis datos sobre as circunstancias nas que se produciu o sinistro.
