
A Asociación Peña Barcelonista Irmandiña organizou onte unha andaina pola Ruta das Alvarizas, unha iniciativa destinada a dar a coñecer, recuperar e poñer en valor o patrimonio etnográfico e cultural do territorio.
A actividade permitiu ás persoas participantes achegarse a estas construcións tradicionais, as alvarizas, elementos característicos da arquitectura popular vinculada á apicultura e presentes en diferentes territorios da Europa atlántica, como Galiza, Irlanda, Escocia ou Bretaña.
Estas construcións, empregadas tradicionalmente para protexer as colmeas dos animais e favorecer o aproveitamento dos recursos naturais, representan unha parte importante da memoria colectiva e da relación histórica das comunidades coa natureza.
A andaina converteuse tamén nunha oportunidade para reivindicar a importancia de conservar os camiños, as construcións tradicionais e os coñecementos transmitidos de xeración en xeración. Un patrimonio que non só fala do noso pasado, senón que contribúe a comprender quen somos e a fortalecer a identidade propia.
Desde o BNG de Vimianzo quixeron agradecer publicamente á Asociación Peña Barcelonista Irmandiña a súa implicación e compromiso coa recuperación, defensa e divulgación do patrimonio local.
A formación nacionalista destacou que iniciativas coma esta demostran o importante papel do asociacionismo na dinamización social, na transmisión da cultura popular e na construción dunha comunidade orgullosa das súas raíces.
Coidar o patrimonio é tamén manter viva a memoria dun pobo. Por iso, actividades como a Ruta das Alvarizas contribúen a que a historia, os saberes tradicionais e a identidade de Vimianzo sigan presentes nas vindeiras xeracións.
