VECIÑOS DE MALPICA DENUNCIAN DANOS NA SÚA VIVENDA TRAS OS TRABALLOS DE CAMBIO DE POSTES DE TELECOMUNICACIÓNS

Malpica de Bergantiños. Unha familia de Malpica de Bergantiños denuncia os danos ocasionados na súa vivenda durante os traballos de substitución de postes de telecomunicacións realizados o pasado día 9 na zona de Beo, onde un dos postes situado xunto á súa casa foi colocado ou manipulado demasiado preto da propiedade, provocando a rotura da uralita e da parede.

Segundo explican os afectados, os danos deixaron a cuberta en mal estado, permitindo a entrada de abundante auga no interior da vivenda. Ante a situación e para evitar que o problema fose a máis, tiveron que colocar provisionalmente un material sobre a uralita danada, á espera de que se poida reparar definitivamente.

O perito do seguro xa visitou a vivenda e os propietarios remitíronlle fotografías do estado no que quedaron os danos tras os traballos. Non obstante, a compañía aseguradora solicita que se identifique a empresa responsable da intervención para poder tramitar a reclamación.

Os afectados aseguran que tamén se dirixiron ao primeiro tenente de alcalde, responsable da área de Servizos e Obras, para preguntar que empresa realizou os traballos. Segundo relatan, a resposta recibida foi que o Concello non sabe que empresa foi e que non ten a obriga de coñecelo.

Esta contestación provoca indignación e desconcerto entre os veciños, que consideran difícil entender que se realicen traballos de substitución, instalación ou retirada de postes nunha zona do municipio sen que se poida identificar a empresa que os executou.

«Andan traballando nun concello e non saben quen son?», cuestionan os afectados, que lembran que tanto o seguro como outras persoas consultadas lles indican que o Concello debería poder coñecer ou averiguar quen realizou a intervención.

Os propietarios consideran que, se os traballos se efectuaron na vía pública, debería existir algún tipo de autorización, comunicación, permiso de ocupación ou documentación que permita identificar a empresa contratista ou a operadora responsable. Por iso, reclaman que se investigue quen realizou os traballos na zona de Beo e que se lles facilite esa información para poder reclamar polos danos ocasionados na súa vivenda.

A familia pide unha resposta e unha solución, xa que, ademais dos desperfectos materiais, a rotura da cuberta provocou filtracións de auga e obrigou a realizar unha reparación provisional para evitar maiores consecuencias.

Os afectados esperan que se identifique a empresa responsable e que se fagan cargo dos danos causados, mentres cuestionan a falta de información sobre uns traballos que, segundo denuncian, acabaron afectando directamente a súa casa.