A alcaldesa de Teo asegura que a incidencia no chan do Centro de Saúde dos Tilos foi solucionada e acusa o BNG de «alarmar» á veciñanza

A alcaldesa de Teo, Lucía Calvo, asegurou que a incidencia rexistrada no chan do Centro de Saúde dos Tilos, tras o levantamento repentino de varias baldosas, foi solucionada polo Concello con rapidez e que a situación non afectou ao normal funcionamento da asistencia sanitaria.

Segundo explicou a rexedora, os técnicos municipais realizaron unha inspección do inmoble tras ter coñecemento do incidente e comprobaron que o problema estaba localizado. A reparación levouse a cabo mediante a colocación de novas pezas, uns traballos que, segundo destacou Calvo, se realizaron durante un día festivo e en fin de semana para garantir a continuidade da actividade sanitaria.

A alcaldesa cualificou o sucedido como unha «incidencia puntual» que o Executivo local resolveu «en tempo e forma». Neste sentido, criticou a postura do BNG de Teo, ao que acusou de trasladar unha mensaxe alarmista á cidadanía.

«Non me parece sensato que o BNG de Teo se dedique a alarmar á veciñanza desa forma», manifestou Calvo, que aproveitou para lembrar as actuacións de mellora realizadas nas instalacións do centro sanitario.

### Melloras nas instalacións

A rexedora destacou que o Centro de Saúde dos Tilos foi obxecto de diferentes traballos de acondicionamento, entre os que citou a mellora do sistema de calefacción, coa substitución da caldeira, de varios radiadores e da bomba de circulación.

As actuacións tamén incluíron a renovación da pintura en distintas estancias e a optimización da iluminación interior do edificio.

Con estes argumentos, Lucía Calvo defendeu a xestión do Goberno municipal e rexeitou as críticas da oposición. «Pasividade cero. Aquí hai traballo, xestión e resultados», concluíu a alcaldesa.