
O profesorado visitante participou nunha experiencia de observación profesional (Job Shadowing) para coñecer de primeira man o funcionamento do sistema educativo galego e as metodoloxías de traballo do centro.
Dodro, 21 de novembro de 2026. O CPI Plurilingüe Eusebio Lorenzo Baleirón de Dodro acolleu esta semana a visita dunha delegación de docentes procedentes de Turquía, nunha iniciativa de intercambio e cooperación educativa desenvolvida ao abeiro do programa Erasmus+ da Unión Europea.
A mobilidade, incluída na acción KA1 de observación profesional (Job Shadowing), permitiu ao profesorado visitante coñecer o funcionamento do sistema educativo galego, observar diferentes prácticas pedagóxicas e intercambiar experiencias sobre metodoloxías de ensino, especialmente no ámbito das linguas estranxeiras.
A delegación estaba integrada por profesionais de distintas especialidades do centro Namık Kemal Ortaokulu, situado na cidade turca de Konya, así como por un representante da Dirección Provincial de Educación Nacional de Turquía. Durante a súa estadía, puideron achegarse á realidade educativa do CPI dodrense, compartir experiencias co profesorado do centro e coñecer o seu modelo de organización e traballo.
O programa Erasmus+ favorece este tipo de mobilidades internacionais, que contribúen á formación permanente do profesorado, á innovación educativa e ao fortalecemento dos vínculos entre centros de diferentes países, promovendo unha educación máis aberta, inclusiva e plurilingüe.
Recepción no Concello de Dodro
A visita incluíu tamén unha recepción institucional na casa consistorial de Dodro, onde a delegación turca foi recibida polo alcalde, Javier Castro. Durante o encontro, o rexedor deu a benvida aos visitantes e presentoulles as principais características xeográficas, históricas e sociais do municipio, ademais de destacar a riqueza do seu patrimonio natural e cultural e a hospitalidade da súa veciñanza.
Esta recepción permitiu aos docentes coñecer un pouco máis a realidade de Dodro e o seu entorno, complementando a experiencia educativa cunha aproximación á cultura, á identidade e á vida local.
Desde a dirección e a comunidade educativa do CPI Plurilingüe Eusebio Lorenzo Baleirón agradeceron a colaboración do Concello de Dodro, do IES Lamas de Abade e de Isabel Sóñora, cuxa implicación e apoio loxístico resultaron fundamentais para o desenvolvemento da visita.
A iniciativa constitúe unha nova oportunidade para estreitar lazos entre comunidades educativas europeas e reforzar o compromiso do centro dodrense coa internacionalización, o plurilingüismo e a cooperación educativa.


