O SERGAS, condenado a indemnizar cunha TCAE con 15.000 euros tras ser agredida por un paciente psiquiátrico

Unha sentenza da Xurisdición Social condenou o Servizo Galego de Saúde (SERGAS) a indemnizar cun total de 15.000 euros a unha técnica en coidados auxiliares de enfermaría (TCAE) que sufriu unha agresión por parte dun paciente ingresado nunha unidade de agudos de Psiquiatría.

Os feitos producíronse cando a traballadora, que desempeñaba o seu labor nunha planta de agudos dun servizo de Psiquiatría, estaba a servir a comida a un paciente ingresado. Durante esa tarefa foi agredida, sufrindo lesións nunha man que precisaron nove meses para a súa recuperación.

Segundo explica a representación legal da afectada, tras iniciar o procedemento de responsabilidade patronal, o SERGAS non chegou a ditar resolución, polo que a traballadora tivo que acudir á vía xudicial para reclamar unha indemnización polos danos sufridos.

Durante o xuízo quedou acreditada, segundo a parte demandante, a existencia dun déficit de persoal na quenda, que incumpría o protocolo establecido para a atención deste tipo de pacientes. As instrucións contemplaban que a asistencia debía realizarse coa presenza dun celador, polo que debían estar dous profesionais.

A resolución tamén tivo en conta as deficiencias na formación proporcionada polo SERGAS para previr e afrontar situacións de risco derivadas de posibles agresións por parte dos pacientes.

A falta de efectivos e a insuficiente formación preventiva foron elementos determinantes para establecer a responsabilidade do servizo sanitario, que deberá aboar á traballadora unha indemnización de 15.000 euros.

O caso volve poñer sobre a mesa a importancia de garantir unhas condicións de seguridade adecuadas para os profesionais sanitarios, especialmente naquelas unidades nas que a atención aos pacientes pode implicar situacións de risco.