
Jacobo Rey participou no Día do Pixama, celebrado no colexio La Salle de Santiago con motivo do Día Mundial da Infancia.
SANTIAGO DE COMPOSTELA, 20 de novembro de 2026.– A Xunta de Galicia puxo en valor o acollemento familiar como unha medida fundamental para garantir o dereito dos nenos e nenas a crecer nun entorno familiar, afectivo e seguro. Así o destacou esta mañá o director xeral de Familia, Infancia e Dinamización Demográfica, Jacobo Rey, durante a celebración do Día do Pixama no colexio La Salle de Santiago de Compostela.
A iniciativa, promovida pola Asociación Galega de Familias Acolledoras (Acougo) e desenvolvida en diferentes centros educativos galegos, coincidiu coa conmemoración do Día Mundial da Infancia e busca sensibilizar sobre a realidade dos menores que, por distintas circunstancias, non poden vivir temporalmente coas súas familias de orixe.
Durante o encontro cos escolares, Jacobo Rey salientou a importancia de promover o acollemento familiar como alternativa que permite aos nenos e nenas medrar nun ambiente de cariño, estabilidade e protección, ao tempo que agradeceu o compromiso e a solidariedade das familias acolledoras.
O Día do Pixama constitúe unha acción de sensibilización para achegar á sociedade a realidade do acollemento familiar desde unha perspectiva educativa, implicando os máis pequenos e fomentando valores como a empatía, a convivencia e o respecto polos dereitos da infancia.
A Xunta reafirma así o seu compromiso coa protección dos menores e coa promoción de medidas que favorezan o seu benestar e desenvolvemento integral, situando o dereito a crecer en familia como unha prioridade.
