O Bergantiños non puido pasar do empate ante un Atlético Astorga que ocupa postos de descenso, nun encontro marcado pola falta de acerto ofensivo dos carballeses.
O conxunto dirixido por Simón Lamas enlaza xa tres partidos sen ver porta, aínda que mantén tamén a súa portería a cero por terceira xornada consecutiva grazas á solidez de Santi Canedo, o que lle permite seguir na zona alta da clasificación.
O debut de Frank nos minutos finais non foi suficiente para romper a igualada. A pesar da forte tormenta previa ao choque, o partido comezou con intensidade. Aos 30 segundos, Adri Álvarez protagonizou o primeiro aviso cun potente disparo que atrapou Santi Canedo en dous tempos.
O Bergantiños logrou facerse co control do balón, pero topouse cun Astorga moi ordenado e xunto en defensa, que neutralizou as recepcións de Darío e limitou a profundidade de Jony.
Marru, máis activo por dentro, xerou a primeira ocasión clara para os locais cun disparo cruzado que saíu rozando o poste. O Astorga respondeu con accións perigosas lideradas por un inspirado Adri Álvarez, cuxo centro envelenado estrelouse no traveseiro ante a sorpresa de Canedo.
Pouco despois, o atacante visitante volveu rozar o gol cun pase a Ayoub dentro da área que o dianteiro resolveu sen éxito.
O Bergantiños tamén tivo opcións para adiantarse. Na prolongación dun córner, Marru rematou fóra, e instantes máis tarde, Llamazares brillou ante un disparo de Iago Novo tras unha gran acción individual de Fito. Na segunda metade, ambos os conxuntos mantiveron o intercambio de chegadas.
Llamazares volveu aparecer para frear un man a man con Koke, mentres que Santi Canedo realizou unha das paradas do partido no minuto 54 ao desviar un cabezazo picado de Jesu que se coaba na portería. O marcador non se moveu e o Bergantiños suma un punto que sabe a pouco por xogo e ocasións, nun duelo marcado pola falta de puntería de ambos os equipos.
