As obras de mellora da estrada que une os núcleos do Lorteiro e Goexe, na parroquia de Montemaior (A Laracha), avanzan a bo ritmo, segundo informou o Concello.
A intervención abrangue preto de 1.650 metros de trazado nos que se está a ampliar a plataforma viaria, renovar o firme con aglomerado asfáltico, optimizar o sistema de drenaxe de augas pluviais e actualizar a sinalización co obxectivo de incrementar a seguridade na circulación. Trátase dunha vía fundamental para o acceso a máis de trinta parcelas agrícolas xestionadas por diversas explotacións, polo que a mellora non só reforzará as comunicacións entre ambos asentamentos, senón que tamén facilitará o traballo diario das explotacións agroganadeiras e o tránsito da maquinaria.
O investimento total ronda os 135.000 euros. Agader financia máis de 88.000 euros a través do Plan Camiña Rural 2025-2026 da Xunta, mentres que o Concello de A Laracha asumirá o resto con fondos propios.
