Vimianzo, 28 de marzo de 2026. O BNG de Vimianzo reuniuse o pasado 24 de marzo coa dirección do colexio de Baíñas para coñecer a situación do pavillón e da conserxería. O grupo nacionalista amosa a súa preocupación polo estado do pavillón, actualmente pechado, e lembra que hai apenas un ano, aprobáronse en pleno obras de mellora financiadas pola Xunta.
Así mesmo, denuncia a falta de persoal de conserxería e a negativa do Concello a cubrir a baixa existente, o que está a obrigar ao profesorado a asumir tarefas alleas ás súas funcións, afectando ao funcionamento do centro e podendo xerar problemas de seguridade, especialmente ante unha eventual urxencia sen persoal dispoñible para atendela de inmediato.
Desde o centro solicitouse agardar ata o venres 27 para coñecer a resposta municipal, que finalmente confirmou que non se cubrirá a praza, ofrecendo só tres horas de apoio con persoal de limpeza, unha medida que o BNG considera insuficiente.
O BNG insta ao Concello a adoptar solucións urxentes que garantan a seguridade e o correcto funcionamento do centro.
