O vindeiro sábado 16 de maio celebrarase unha nova xornada de limpeza ambiental nas praias de As Torradas e O Riás, unha iniciativa aberta á participación cidadá que busca facer fronte á crecente problemática dos plásticos e outros residuos que afectan ao litoral.
A actividade, que comezará ás 10:30 horas, terá como punto de encontro o aparcamento da praia de As Torradas. Non será necesaria inscrición previa, polo que todas as persoas interesadas poderán sumarse libremente a esta acción colectiva en defensa do medio ambiente.
Nesta ocasión, a xornada contará coa colaboración especial das entidades Limpocean e Surf and Clean, dúas organizacións comprometidas coa protección dos ecosistemas mariños. A súa participación permitirá achegar coñecemento, recursos e experiencia para reforzar o impacto desta iniciativa.
A convocatoria pretende non só retirar residuos das praias, senón tamén concienciar á sociedade sobre a importancia de preservar os espazos naturais e reducir o uso de plásticos dun só uso.
Desde a organización animan á veciñanza e visitantes a participar nesta actividade, lembrando que pequenos xestos poden marcar unha gran diferenza na conservación do entorno costeiro.
