Galicia e Italia intercambiarán experiencias sobre o futuro dos axentes de desenvolvemento local nun encontro internacional que se celebrará os días 5 e 6 de outubro en Muxía
Muxía, 5 de outubro de 2026. – A Costa da Morte converterase durante os días 5 e 6 de outubro nun punto de encontro europeo arredor do desenvolvemento local e rural coa celebración do encontro transnacional do proxecto LDA-NEXT – Empoderamento da figura dos axentes de desenvolvemento local para unha Europa cohesionada, cofinanciado polo programa Erasmus+ da Unión Europea.
A iniciativa reunirá en Muxía representantes de entidades de Galicia e Italia para analizar o presente e o futuro dos axentes de desenvolvemento local (ADL), compartir experiencias e identificar novas ferramentas e competencias que permitan reforzar o seu papel na transformación dos territorios rurais.
O encontro está organizado por AFIPRODEL, coa participación das entidades italianas LIMEUP e ISPAL e da galega INDA Iniciativas, socias do proxecto europeo. Durante dúas xornadas combinaranse sesións técnicas, dinámicas participativas, networking e visitas a experiencias de desenvolvemento local consideradas boas prácticas na Costa da Morte.
Un espazo europeo para repensar o papel dos axentes de desenvolvemento local
A primeira xornada comezará cun taller transnacional de intercambio de experiencias sobre o papel do axente de desenvolvemento local, que se desenvolverá inicialmente en formato híbrido entre as 09:30 e as 11:00 horas, facilitando a participación de profesionais e entidades de Galicia e Italia.
Tras a apertura, a cargo da presidenta de AFIPRODEL, María Dolores Pena Pena, o representante de LIMEUP, Fabio Saccomani, presentará o proxecto LDA-NEXT. A continuación, Rosa María Sánchez Martínez, técnica de Desenvolvemento Local en Vimianzo e secretaria de AFIPRODEL, abordará as funcións, retos e contribución dos ADL ao desenvolvemento territorial en Galicia.
O programa incluirá tamén a presentación dos primeiros resultados do proxecto, a cargo de Marica Appolloni, de ISPAL, e unha sesión internacional e interactiva de intercambio de experiencias entre os territorios participantes, coordinada por José Ramón Esperante Otero, técnico de Desenvolvemento Local en Mazaricos e vocal de AFIPRODEL.
A partir das 11:30 horas, o encontro continuará de maneira presencial cunha dinámica participativa de cocreación centrada no Marco de Competencias, na futura folla de ruta europea e na creación dunha posible rede europea de axentes de desenvolvemento local. O obxectivo será recoller e priorizar as achegas das persoas participantes para contribuír á construción colectiva dos seguintes pasos do proxecto.
Administracións, entidades e profesionais compartirán a súa visión
A mañá concluirá cunha lectura das principais conclusións e cunha mesa de intervencións arredor do papel do axente de desenvolvemento local no territorio.
Na sesión participarán representantes de diferentes ámbitos vinculados ao desenvolvemento rural, o emprendemento, a formación e a dinamización territorial, entre eles a Universidade de Santiago de Compostela (USC), GDR, GALP, EFA Fonteboa, polos de emprendemento, CMAT, alcaldías, profesionais do desenvolvemento local, a Asociación de Empresarios SOLPOR, APTCM, a Asociación Amigos do Liño e empresas do territorio.
A sesión estará moderada por María Cristina Pereira Ulla, técnica de Formación en Santa Comba e vocal de AFIPRODEL, e Vanessa Crespo Souto, axente de Desenvolvemento Local do Concello de Vedra.
O encontro permitirá así poñer en común diferentes perspectivas sobre os novos retos aos que se enfrontan os territorios e sobre as competencias que precisan os profesionais encargados de impulsar proxectos de desenvolvemento económico, social e ambiental a escala local.
A Costa da Morte como territorio de aprendizaxe
O programa europeo terá tamén unha importante dimensión práctica. As entidades participantes coñecerán durante as dúas xornadas diferentes experiencias de desenvolvemento local e rural da Costa da Morte, co obxectivo de mostrar como a cooperación, a iniciativa empresarial, o patrimonio, a gastronomía e os recursos naturais poden converterse en motores de dinamización territorial.
Na tarde do luns, o grupo percorrerá diferentes iniciativas de Muxía, entre elas o Albergue Bela Muxía, vinculado á prolongación do Camiño de Santiago a Fisterra e Muxía; o Santuario da Virxe da Barca; a tradición do congro seco e a súa relación histórica con Calatayud; e Abrumar I+D+ti by Santi Pérez, centro dedicado ao tratamento e comercialización de produtos procedentes do mar e exemplo de iniciativa apoiada polo GALP Costa da Morte.
A xornada rematará cunha experiencia gastronómica arredor do Outono Gastronómico, iniciativa impulsada pola Xunta de Galicia, e unha queimada, como mostra da cultura e das tradicións galegas.
Dombate, Vimianzo, Camariñas, Lira, Carnota e Fisterra, entre as visitas
A segunda xornada estará dedicada integramente ao coñecemento de novas experiencias e recursos da Costa da Morte.
Pola mañá, o programa levará as persoas participantes ata Dombate, o Castelo de Vimianzo, Camariñas e Cereixo, combinando patrimonio arqueolóxico, histórico, natural e cultural.
Pola tarde, o percorrido continuará por Lira, Carnota, Ézaro e Fisterra, con especial atención a experiencias vinculadas á pesca, á gastronomía, ao patrimonio e ao aproveitamento dos recursos locais. Entre elas figura a visita a Pepe do Cuco e á Confraría de Lira, relacionada co movemento Slow Food, así como ao Faro de Fisterra e o Semáforo.
Deste xeito, o encontro pretende converter a Costa da Morte nun auténtico laboratorio de experiencias de desenvolvemento territorial, mostrando aos socios europeos iniciativas que nacen do propio territorio e que contribúen á súa valorización económica, social, cultural e turística.
Cara a unha rede europea de axentes de desenvolvemento local
O encontro de Muxía constitúe un novo paso no desenvolvemento de LDA-NEXT, un proxecto que busca reforzar o recoñecemento e as capacidades dos axentes de desenvolvemento local e favorecer a cooperación entre profesionais e territorios europeos.
A análise de boas prácticas, o intercambio de coñecementos e a definición dun Marco Europeo de Competencias, xunto coa reflexión sobre unha futura rede europea de axentes de desenvolvemento local, forman parte das liñas de traballo que se abordarán ao longo das xornadas.
Para AFIPRODEL, acoller este encontro supón tamén unha oportunidade para visibilizar o traballo que se desenvolve desde os territorios rurais galegos e compartir con outros países europeos experiencias que poden ser adaptadas e replicadas noutros contextos.
A Costa da Morte convértese así durante dous días nun espazo de diálogo europeo no que o desenvolvemento local, a cooperación e a innovación territorial serán os grandes protagonistas.
