Os operativos de vixilancia e control contra o furtivismo nas rías galegas continúan dando resultados. Nos últimos días, os Gardacostas de Galicia retiraron máis de 400 nasas e cacharros ilegais e comisaron arredor de 150 quilos de capturas, principalmente polbo e nécora.
Segundo informou o servizo de Gardacostas, unha parte maioritaria das capturas atopadas estaban vivas no momento da intervención, polo que foron devoltas ao mar.
As actuacións forman parte dos labores permanentes de vixilancia e control da actividade marisqueira e pesqueira, destinados a combater o furtivismo e protexer os recursos mariños das rías galegas.
A retirada das artes ilegais permite, ademais, reducir o risco de capturas accidentais e contribuír á conservación das especies e ao aproveitamento sostible dos recursos do litoral galego.
