A Deputación da Coruña presentou en Malpica un proxecto piloto de dinamización lingüística destinado a favorecer a integración social e laboral das persoas migrantes mediante a aprendizaxe da lingua e da cultura galega. A iniciativa está dirixida especificamente a persoas estranxeiras que non falan galego e pretende converter o idioma propio de Galicia nunha ferramenta de acollida, comunicación e cohesión social.
O programa xorde tras detectarse unha necesidade concreta no municipio e xa conta co interese de máis de cincuenta potenciais participantes. Entre eles atópanse traballadores do sector do mar procedentes de diferentes rexións do mundo, como o Magreb, Indonesia e varios países do sur de África. A Confraría de Malpica colaborou activamente na identificación das persoas interesadas, ante a falta de recursos propios para ofrecer este tipo de formación.
Durante a presentación, a deputada delegada de Lingua, Sol Agra, destacou a importancia da inmigración para o desenvolvemento demográfico e social da provincia. Segundo explicou, “a veciñanza da provincia medra ano tras ano grazas ás persoas migrantes que a escollen para desenvolver a súa vida, achegando diversidade cultural, dinamismo social e un incremento demográfico moi necesario”. Neste sentido, subliñou a responsabilidade das institucións de proporcionar ferramentas que faciliten a súa integración, entre as que situou o coñecemento da lingua e da cultura galega.
A representante provincial explicou tamén que este proxecto piloto responde ás demandas trasladadas desde o sector do mar, que precisa formación específica para traballadores que non coñecen ningunha das linguas oficiais de Galicia.
A iniciativa está financiada integramente pola Deputación da Coruña, que asumirá os custos relacionados co persoal docente, a elaboración de materiais didácticos, a xestión administrativa e o alugueiro das instalacións. Pola súa parte, a Fundación Vía Galego encargarase da coordinación xeral do programa, incluíndo a planificación das sesións, o rexistro dos participantes, a difusión da iniciativa e a avaliación do seu desenvolvemento.
O curso terá unha duración de sete meses, cunha sesión semanal de hora e media, o que suporá un total de 84 horas de formación distribuídas en dous grupos. Os horarios adaptaranse ás necesidades laborais do alumnado para garantir a súa asistencia e compatibilizar a aprendizaxe coa actividade profesional.
As clases estarán impartidas por unha persoa licenciada en Filoloxía Galega e os contidos axustaranse aos perfís dos participantes, incorporando vocabulario específico relacionado co sector do mar ou co comercio. Ademais, a metodoloxía priorizará a creación de espazos seguros e de confianza nos que as persoas asistentes poidan practicar a comunicación oral de maneira natural, sen correccións constantes nin xuízos, favorecendo así unha aprendizaxe máis efectiva e inclusiva.
Con esta iniciativa, a Deputación da Coruña aposta por promover o galego como lingua de integración e por reforzar a inclusión social das persoas migrantes, contribuíndo á súa participación plena na vida económica e comunitaria dos municipios da provincia.