
A programación desenvolverase entre novembro de 2026 e xullo de 2027 e incluirá actividades ambientais, excursións, proxectos educativos e experiencias ao aire libre.
A Escola Ambiental de Senda Nova-Concello de Carballo puxo en marcha o pasado sábado 14 de novembro a súa XV edición cun acto de presentación celebrado no Espazo da Natureza de Oza, no que participaron os 25 rapaces e rapazas de Carballo que formarán parte desta iniciativa.
Ao encontro tamén asistiron familiares dos participantes e socios e socias de Senda Nova, nunha xornada que serviu para dar a coñecer os contidos e as actividades dunha programación que se consolidou como unha referencia en Galicia no ámbito da educación ambiental dirixida á mocidade.
Esta nova edición desenvolverase entre novembro de 2026 e xullo de 2027, combinando sesións de aula, actividades no exterior, propostas no Espazo da Natureza de Oza, excursións e mesmo pernoctas ao aire libre na última etapa do programa. As actividades terán lugar, con carácter xeral, todos os sábados pola mañá, agás aquelas sesións especiais que requiran máis tempo.
### A HORTA, A CHARCA E O GALIÑEIRO, EIXES DA PROGRAMACIÓN
Un dos principais atractivos desta XV edición serán os tres proxectos transversais que acompañarán os participantes ao longo de todo o curso: a horta ecolóxica, a charca e o galiñeiro.
A través destas iniciativas, os mozos e mozas poderán coñecer de primeira man os ciclos naturais, participar no seguimento dos cultivos e descubrir a importancia da biodiversidade e do respecto polo medio ambiente. A programación tamén incluirá actividades relacionadas coa cultura e o coñecemento da contorna.
Os produtos cultivados na horta terán como destino final a feira, unha actividade que se desenvolverá entre os meses de maio e xuño e que permitirá completar o proceso de aprendizaxe iniciado ao comezo do programa.
### EXCURSIÓNS PARA DESCUBRIR O PATRIMONIO NATURAL DA COMARCA
As saídas e excursións serán outro dos piares fundamentais da Escola Ambiental. Os participantes terán a oportunidade de coñecer algúns dos espazos de maior interese ecolóxico e patrimonial da comarca, con visitas previstas a lugares como o Bosque da Ribeira da Pena, Baldaio ou o Esteiro do Anllóns, entre outros.
Con esta combinación de actividades prácticas, experiencias na natureza e coñecemento do territorio, Senda Nova busca fomentar entre a mocidade valores de respecto ambiental, participación e compromiso coa conservación da contorna.
A organización confirmou que xa están cubertas as 25 prazas dispoñibles para esta edición. As novas solicitudes quedarán incorporadas a unha lista de agarda, á que se poderá recorrer no caso de producirse algunha baixa durante o desenvolvemento da programación.
