Seaia acolleu a IV Xuntanza de Maiores de Malpica, unha celebración que reuniu a máis de 200 persoas nunha xornada de convivencia, comida e música, marcada polo bo ambiente entre os asistentes pero tamén polas críticas á situación xeral do municipio.
O encontro contou coa presenza do director xeral contra a violencia de xénero da Xunta de Galicia, Roberto Barba Alvedro, que asistiu por terceiro ano consecutivo e foi recibido polo alcalde, Eduardo Parga, xunto a membros da corporación municipal.
Máis alá do carácter festivo da xornada, entre parte dos asistentes e sectores veciñais volveu poñerse o foco nas eivas que afectan ao día a día do concello. Entre elas mencionáronse cuestións como o estado de servizos e infraestruturas municipais, o mantemento de rúas, a iluminación pública, a situación de instalacións como a piscina municipal ou o centro de día, así como a falta de actuacións no coidado de espazos públicos e limpeza en determinadas zonas.
Estas preocupacións conviviron co desenvolvemento do evento, que incluíu unha comida de confraternidade e a actuación musical do Trío Rosel, encargado de animar a tarde con baile e música.
O alcalde, Eduardo Parga, agradeceu a asistencia e a participación da veciñanza, destacando a importancia destes encontros para favorecer a convivencia e o encontro social entre maiores.
A xornada rematou nun ambiente festivo, aínda que coa percepción entre algúns asistentes de que este tipo de eventos non deberían substituír o debate sobre as necesidades estruturais e de servizos que, segundo apuntan, segue tendo o municipio.
