AAVV Volta do Castro-O Rial reclama desde hai anos unha actuación para mellorar a recollida de augas pluviais e evitar que a auga entre nas casas.
A veciñanza do Rial volve alzar a voz ante un problema que, segundo denuncia a Asociación Veciñal Volta do Castro-O Rial, continúa sen solución: as inundacións nas vivendas durante os episodios de choiva.
A asociación asegura que leva anos solicitando unha intervención para modificar o diámetro da rede de recollida de augas pluviais, así como dos sumidoiros que conectan directamente coas vivendas, co obxectivo de mellorar a capacidade de evacuación da auga e evitar novas inundacións.
Porén, un ano máis, os residentes vense obrigados a retirar a auga das súas propias casas cada vez que se producen fortes precipitacións, unha situación que xera preocupación, molestias e importantes prexuízos para as familias afectadas.
Desde a entidade veciñal cuestionan que unha actuación que consideran necesaria siga sen executarse e denuncian a falta dunha resposta efectiva por parte das administracións responsables.
A pregunta que trasladan é clara: **canto tempo máis terán que esperar os veciños e veciñas para poder vivir sen medo a que a choiva volva inundar as súas casas?**
A veciñanza reclama solucións, compromisos e unha intervención que permita poñer fin a un problema que, segundo sinalan, leva demasiado tempo esperando resposta.
**Fonte: AAVV Volta do Castro-O Rial.**
