Ponteceso (A Coruña), 1 de xuño de 2026. A delegada da Xunta na Coruña, Belén do Campo, destacou este martes o compromiso do Goberno galego coa mellora da seguridade viaria e coa promoción da mobilidade sostible no concello de Ponteceso, onde se están a desenvolver actuacións que superan os 1,3 millóns de euros de investimento.
A representante autonómica, acompañada polo alcalde de Ponteceso, José Manuel Mato, e pola directora territorial da Consellería de Vivenda e Planificación de Infraestruturas, Begoña Freire, visitou a senda peonil xa executada no lugar de Pazos e a zona onde está prevista a construción dun novo itinerario peonil na estrada AC-424, en Corme.
Durante a visita, Belén do Campo subliñou que estas actuacións reflicten “a aposta da Xunta por mellorar a seguridade viaria, facilitar os desprazamentos a pé e contribuír á mellora da calidade de vida da veciñanza, especialmente nos municipios do rural”.
Nova senda en Corme
A nova actuación prevista en Corme contará cun investimento próximo aos 565.000 euros e permitirá conectar mediante un itinerario peonil seguro os núcleos de Corme Aldea e Corme Porto, principal centro de servizos da zona.
O proxecto, aprobado provisionalmente polo Consello da Xunta o pasado 11 de maio e sometido xa a información pública, contempla a construción dunha senda de 685 metros de lonxitude pola marxe esquerda da estrada AC-424, entre os puntos quilométricos 6+630 e 7+356. Esta infraestrutura enlazará coa senda xa existente ata Corme Porto, reforzando a conectividade peonil do municipio.
O itinerario terá máis de dous metros de ancho e contará cun pavimento de cor terriza, unha nova beiravía de medio metro, melloras na drenaxe mediante a execución dunha cuneta e a construción dun muro de contención de formigón armado para minimizar o impacto sobre unha vivenda próxima.
Ademais, prevese a pavimentación dos accesos ás propiedades afectadas, a execución das actuacións de drenaxe necesarias e a preinstalación de canalizacións para futuras redes de telecomunicacións e abastecemento.
Segundo avanzou a delegada, a previsión é aprobar definitivamente o proxecto durante o outono, para posteriormente redactar o proxecto construtivo e licitar as obras, que terán un prazo estimado de execución de nove meses.
Melloras xa rematadas en Pazos
A visita institucional incluíu tamén a comprobación das obras xa rematadas en Pazos, executadas ao abeiro do Plan Hurbe e cun investimento total próximo aos 400.000 euros.
A actuación consistiu na construción dunha senda peonil na marxe esquerda da estrada AC-419, entre os puntos quilométricos 2+990 e 3+350, ademais da creación dunha zona de aparcamento, dous pasos de peóns e o reforzo da sinalización viaria.
A Xunta financiou o 70 % do investimento, cunha achega de 278.074 euros, mentres que o Concello de Ponteceso asumiu os 119.174 euros restantes.
Belén do Campo destacou que esta intervención permitiu mellorar de forma significativa a seguridade viaria da contorna e dar continuidade aos percorridos peonís existentes mediante espazos máis accesibles e seguros para a cidadanía.
Aposta polo rural
A delegada da Xunta puxo en valor o papel do Plan Hurbe como instrumento para impulsar a renovación dos espazos públicos, mellorar a accesibilidade e reforzar o atractivo dos núcleos rurais.
“É unha ferramenta fundamental para facer máis atractivos os nosos pobos e vilas, reforzar a súa competitividade económica e contribuír á fixación de poboación no territorio”, sinalou.
Finalmente, reiterou o compromiso do Goberno galego coa creación de infraestruturas que favorezan unha mobilidade máis segura, sostible e accesible para todos os veciños e veciñas de Galicia, especialmente nos municipios do rural.
