Unha persoa resultou ferida nun accidente de tráfico rexistrado na tarde deste mércores na estrada AC-552, á altura do punto quilométrico 61, na zona da Reparada, pertencente á parroquia de Salto, no concello de Vimianzo.
O sinistro produciuse nas proximidades de AgroSoneira, mobilizando ata o lugar aos servizos de emerxencia. Efectivos sanitarios, Garda Civil de Tráfico e membros de Protección Civil desprazáronse para atender á persoa afectada e garantir a seguridade na vía.
Polo momento descoñécense as causas do accidente e o alcance exacto das lesións sufridas pola persoa implicada. Durante a intervención dos equipos de emerxencia rexistráronse algunhas retencións e dificultades na circulación.
As autoridades continúan investigando as circunstancias nas que se produciu o sinistro.