Veciños de Ardaña, no concello de Carballo, alertan da presenza de persoas que estarían acudindo porta por porta facéndose pasar por empregados do Instituto Nacional de Estatística (INE).
Segundo a información trasladada por veciños da parroquia, estas persoas presentarían documentación e supostas acreditacións do Ministerio do Interior e asegurarían que necesitan comprobar unha identificación válida con motivo dun próximo censo.
O procedemento descrito pola veciñanza resulta especialmente preocupante. Segundo a alerta, os individuos levarían un ordenador portátil e un dispositivo biométrico, e chegarían a solicitar fotografías e pegadas dixitais, ademais de información persoal. Tamén mostrarían menús e datos na pantalla para intentar dar aparencia oficial á actuación.
🚨 RECOMÉNDASE NON FACILITAR DATOS
Ante unha visita deste tipo, recoméndase non entregar documentación, non facilitar datos persoais ou biométricos e non permitir o acceso ao domicilio sen comprobar previamente a identidade das persoas e a finalidade da visita a través de canles oficiais.
A veciñanza asegura que non tería coñecemento de ningunha iniciativa oficial que xustifique a recollida deste tipo de datos para un próximo censo, polo que pide extremar as precaucións.
En caso de recibir unha visita sospeitosa, recoméndase non continuar coa entrevista e contactar coas forzas de seguridade para verificar a identidade das persoas. Guardia Civil Carballo: 981 70 40 65
⚠️ IMPORTANTE: a presenza de documentación, acreditacións ou dispositivos electrónicos non garante por si mesma que unha visita sexa oficial. Ante calquera dúbida, non facilite datos persoais, fotografías nin pegadas dixitais.
A alerta afecta á parroquia de Ardaña, no concello de Carballo. Recoméndase compartir esta información coa veciñanza, especialmente con persoas maiores, para evitar posibles situacións de engano ou fraude.
