Coirós, A Coruña. A delegada territorial da Xunta na Coruña, Belen do Campo, visitou Coirós para coñecer de primeira man o traballo que están a desenvolver as oito persoas contratadas polo Concello ao abeiro do programa Galicia Suma Talento: Rural Activo.
Durante a visita, acompañada polo alcalde de Coirós, Francisco Quintela, a representante autonómica interesouse polas distintas actuacións que se están levando a cabo no municipio. As persoas participantes están contratadas durante nove meses, a xornada completa, para realizar labores relacionados coa conservación e coidado do territorio.
Entre as tarefas desenvolvidas atópanse a limpeza de montes, a xestión da biomasa, o mantemento de espazos naturais e diferentes actuacións forestais e ambientais, contribuíndo así á mellora e conservación das zonas rurais do concello.
A iniciativa conta cunha achega da Xunta de Galicia superior aos 135.000 euros, destinada a financiar estas contratacións e facilitar novas oportunidades laborais para persoas desempregadas.
Ao mesmo tempo, os traballos realizados no marco do programa permiten reforzar as actuacións de prevención dos incendios forestais, reducir a presenza de biomasa e favorecer o mantemento e coidado dos espazos naturais de Coirós.
A visita permitiu poñer en valor o dobre obxectivo deste tipo de iniciativas: favorecer a incorporación ao mercado laboral de persoas desempregadas e impulsar actuacións de protección, conservación e mellora do territorio rural galego.
