O municipio ofrece este sábado e domingo unha variada programación que inclúe unha excursión a Portugal, teatro, un magosto popular e unha nova cita futbolística do Xuventude Cabanas.
O Concello de Cabanas prepárase para vivir unha nova fin de semana chea de propostas para todos os públicos. A programación, que se desenvolverá os días 24 e 25, combina cultura, gastronomía, lecer e deporte, con actividades organizadas por diferentes entidades do municipio.
Sábado 24: excursión, teatro e magosto
A xornada do sábado comezará cedo cunha excursión a Portugal organizada pola Asociación de Veciños Pinar da Magdalena. A saída terá lugar ás 8.15 horas desde o Concello e ás 8.30 horas desde a Churrería Las Vegas. A viaxe inclúe unha visita á Feira de Vila Nova de Cerveira, xantar no restaurante Davide Alfonso e un percorrido pola Fortaleza. O prezo é de 45 euros para as persoas socias e de 50 euros para as non socias. As prazas son limitadas e as persoas interesadas poden inscribirse no teléfono 604 315 473.
Pola tarde, ás 19.30 horas, a Casa da Cultura acollerá unha nova sesión do Ciclo de Teatro coa representación de Nós somos así, a cargo da Asociación Club de Maiores. A entrada será gratuíta ata completar a capacidade da sala.
A programación do sábado completarase ás 20.30 horas co tradicional magosto do S.C.R.D. San Mamede de Laraxe. As persoas asistentes poderán degustar castañas, liscos e pan, nunha celebración que contará coa música do DJ Gelo, sorteos e actividades sorpresa para os máis pequenos. Ademais, a organización anima a acudir co disfrace máis arrepiante.
O prezo será de 4 euros para as persoas socias e de 6 euros para as non socias. Para participar, é necesario anotarse antes do mércores 21 no ambigú da entidade ou nos teléfonos 600 657 078 e 622 062 203.
Domingo 25: fútbol en A Veiga
A fin de semana pecharase cunha nova cita deportiva. O domingo, ás 12.00 horas, o Xuventude Cabanas enfrontarase ao C.D. Estrella A Solaina no campo de A Veiga.
O equipo local buscará prolongar a boa dinámica dos últimos encontros nun partido que terá entrada gratuíta, polo que a afección está convidada a achegarse para apoiar os xogadores.
Con esta programación, Cabanas ofrece unha nova oportunidade para gozar do outono a través da convivencia veciñal, a cultura, as tradicións gastronómicas e o deporte.
