O Concello reforza as medidas de aforro ante o descenso continuado dos caudais do río Anllóns e pide á cidadanía que limite os consumos innecesarios
O Concello de Carballo reforzou as medidas de aforro de auga despois de que a Xunta de Galicia elevase de prealerta a alerta a situación na bacía do río Anllóns, debido ao descenso continuado dos caudais rexistrado durante os últimos meses.
Ante este escenario de escaseza, o Concello está a aplicar novas medidas para reducir ao máximo os consumos municipais que non sexan imprescindibles.
Entre as actuacións adoptadas atópanse a cancelación, na medida do posible, das regas de xardíns e zonas verdes, a suspensión dos baldeos das rúas e o peche das fontes ornamentais e públicas.
Así mesmo, quedaron fóra de servizo as duchas e os lavapés das praias, mentres que o Concello anuncia que continuará reducindo calquera outro uso municipal da auga que non resulte necesario.
Estas medidas súmanse ás que xa se viñan aplicando desde a declaración da situación de prealerta o pasado mes de xullo, co obxectivo de contribuír a preservar as reservas dispoñibles.
Chamada á colaboración cidadá
O Concello de Carballo fai tamén un chamamento á responsabilidade da veciñanza e pide a súa colaboración para facer fronte a esta situación.
Desde o Goberno municipal recoméndase evitar os consumos innecesarios e utilizar unicamente a auga que sexa precisa, especialmente mentres se manteña a situación de alerta na bacía do Anllóns.
A evolución dos caudais nos próximos meses será determinante para comprobar se as medidas adoptadas permiten aliviar a situación ou se será necesario aplicar novas restricións e medidas de aforro.