Un motorista de 53 anos perdeu a vida este sábado tras sufrir un accidente de tráfico na estrada AC-415, ao seu paso pola parroquia de Pastoriza, no concello de Arteixo.
O sinistro produciuse arredor das 16:30 horas no punto quilométrico 5 da citada vía. Segundo informou o Centro Integrado de Atención ás Emerxencias 112 Galicia, a alerta foi recibida a través do servizo de urxencias sanitarias 061, que comunicou a existencia dunha persoa ferida de extrema gravidade na calzada.
Ata o lugar desprazáronse de inmediato efectivos dos Bombeiros de Arteixo, axentes da Garda Civil de Tráfico, Policía Local e membros de Protección Civil, ademais dos servizos sanitarios.
A pesar da rápida intervención dos equipos de emerxencia, os profesionais sanitarios non puideron facer nada por salvar a vida do motorista e confirmaron o seu falecemento no mesmo lugar do accidente.
As circunstancias exactas nas que se produciu o sinistro están a ser investigadas polas autoridades competentes.