A ausencia de Rosa Gallego e a exclusión de referentes municipais como María Pose e Ana Rodríguez Montero alimentan a indignación entre parte da afiliación popular.
As listas do PP da provincia da Coruña para o Congreso e o Senado están a provocar malestar entre afiliados que cuestionan os criterios empregados para confeccionar as candidaturas.
Á ausencia de Rosa Gallego súmase o esquecemento de figuras cunha ampla traxectoria política, como María Pose, exalcaldesa de Santa Comba, e Ana Rodríguez Montero, exalcaldesa de Cerdido.
Entre os críticos hai quen considera que o partido deixou polo camiño persoas con máis experiencia, coñecemento do territorio e anos de traballo municipal. Unha situación que reabre o debate sobre o recoñecemento da traxectoria local e o peso da militancia nas decisións da dirección provincial.
O descontento evidencia o malestar dunha parte da afiliación, que cuestiona se o PP coruñés está a aproveitar todo o seu capital político ou se está a prescindir de referentes importantes.
