O estado das infraestruturas en Malpica segue xerando malestar entre a veciñanza. A falta de mantemento en distintos puntos do municipio converteuse nun problema cada vez máis visible, cun deterioro que afecta tanto á imaxe da vila como á seguridade cidadá.
A maleza invade beirarrúas, camiños e espazos públicos, ofrecendo unha sensación de abandono xeneralizado. A isto súmanse numerosos espellos de sinalización rotos ou en mal estado, unha situación que preocupa especialmente en cruces e vías con pouca visibilidade, onde estes elementos resultan fundamentais para evitar accidentes.
Outro dos problemas denunciados polos veciños é o estado dos contedores do lixo. Moitos deles permanecen sen ancoraxe, desprazándose co vento ou dificultando o tránsito, mentres outros presentan roturas evidentes sen que se acometan reparacións nin substitucións.
A percepción entre parte da cidadanía é que o nivel de desgoberno alcanzou un punto crítico, ante a ausencia de respostas e solucións efectivas por parte do Concello. As críticas céntranse na falta de actuacións de mantemento básicas, consideradas esenciais para garantir uns servizos públicos dignos e unha imaxe coidada do municipio.
Os veciños reclaman unha intervención inmediata que permita recuperar espazos públicos deteriorados e poñer fin a unhas carencias que, segundo denuncian, levan demasiado tempo sen resolverse.
