O Concello de Ponteceso pon a disposición do Ministerio Público os informes xurídico e urbanístico tras a denuncia presentada por un particular
O Concello de Ponteceso xa puxo a disposición da Fiscalía Provincial da Coruña toda a documentación solicitada en relación coa promoción inmobiliaria desenvolvida no seu día pola empresa Élite. Entre a información remitida figuran os informes xurídico e urbanístico relativos ao edificio.
O alcalde de Ponteceso, José Manuel Mato, trasladou unha mensaxe de tranquilidade e transparencia e asegurou que a promoción cumpre co establecido no Plan Xeral de Ordenación Municipal (PXOM).
A petición da Fiscalía prodúcese a raíz dunha denuncia presentada por un particular. Ante esta situación, o Concello optou por facilitar toda a documentación requirida para que o Ministerio Público poida analizar os antecedentes e comprobar os aspectos urbanísticos relacionados coa promoción.
Mato insistiu en que a posición municipal é clara: a actuación axústase ao PXOM e o Concello colaborou desde o primeiro momento coa Fiscalía, remitindo os informes e documentos solicitados.
Deste xeito, o Goberno local subliña a súa disposición a facilitar toda a información necesaria e a actuar con transparencia ante calquera requirimento das autoridades competentes.
A Fiscalía deberá agora valorar a documentación recibida e determinar, se procede, as actuacións que considere oportunas. Mentres tanto, desde o Concello mantense a defensa de que a promoción se axusta á normativa urbanística municipal.
