Santa Comba — A organización do 36º Autocross de Santa Comba decidiu prescindir este ano do tradicional punto de lavado a presión debido á situación de crise de auga que afecta actualmente ao municipio.
A medida responde á necesidade de facer un uso responsable dos recursos hídricos ante a situación que atravesa a localidade. Deste xeito, os participantes non dispoñerán dun punto habilitado para a limpeza dos vehículos con auga a presión durante a celebración da proba.
Por outra banda, o rego do circuíto necesario para reducir o po durante a competición realizarase mediante vehículos agrícolas, unha alternativa que permitirá garantir as condicións adecuadas da pista empregando os medios dispoñibles.
Desde a organización sinalan que estas medidas buscan adaptar o desenvolvemento do evento á situación actual e contribuír ao aforro de auga, mantendo ao mesmo tempo as condicións necesarias para que o 36º Autocross de Santa Comba poida celebrarse con normalidade.
A proba volverá reunir en Santa Comba aos afeccionados ao autocross nunha nova edición marcada, ademais da competición, pola necesidade de extremar as medidas de aproveitamento dos recursos hídricos.
