A formación nacionalista alerta dos posibles riscos para as árbores e reclama ao Concello información sobre a intervención realizada na rúa Miraflores, incluída no POS 2024.
A veciñanza de Santa Comba amosou a súa preocupación polo material empregado para cubrir os alcorques das árbores do Campo da Feira, no tramo situado xunto á rúa Miraflores. A actuación, realizada nos últimos días, deixou estes espazos recubertos dun material de aspecto semellante ao cemento, o que xerou dúbidas sobre as posibles consecuencias para a saúde das árbores.
Ante esta situación, o BNG de Santa Comba, a través do seu portavoz municipal, Xoán David Sixto, reclama ao goberno local información sobre os materiais utilizados e os posibles efectos que poden ter sobre a vexetación.
A intervención está incluída no POS 2024 e foi adxudicada polo Concello o pasado mes de novembro por un importe superior aos 200.000 euros.
Dúbidas sobre a permeabilidade e a saúde das árbores
O portavoz nacionalista solicita coñecer «cal é o material empregado para a actuación nos alcorques e se pode supoñer un risco para as árbores».
Desde o BNG advirten de que o uso de materiais impermeables podería dificultar a absorción da auga e a osixenación do solo, dous factores fundamentais para o desenvolvemento das raíces. Ademais, sinalan que, mesmo no caso de materiais porosos que permitan o paso da auga, determinadas resinas poderían resultar prexudiciais para as árbores.
A formación considera necesario aclarar a composición do material utilizado e comprobar que a solución aplicada sexa compatible coa conservación da vexetación existente.
Un espazo público de referencia para a veciñanza
O BNG pide ao goberno municipal que ofreza información clara e veraz sobre os traballos realizados, co obxectivo de resolver as dúbidas da veciñanza e aclarar se a intervención pode ter consecuencias para as árbores.
O Campo da Feira é unha das zonas máis concorridas de Santa Comba e un dos espazos públicos da vila que conta con árbores de sombra, polo que a formación nacionalista subliña a importancia de garantir a conservación deste patrimonio verde e de que as actuacións urbanísticas teñan en conta as necesidades da vexetación.
A formación agarda que o Concello explique que material se empregou e que garantías existen de que a actuación non compromete a saúde das árbores.
