A representación do persoal advirte da posible convocatoria de mobilizacións ante a chegada do período de maior intensidade do tráfico en Vigo
Vigo, 9 de novembro de 2026. O comité de empresa de Vitrasa, concesionaria do servizo de transporte urbano de Vigo, denuncia a falta de actualización dos horarios das liñas de autobús e as dificultades para cumprilos debido aos problemas de circulación. Ante esta situación, a representación do persoal non descarta convocar mobilizacións para reclamar solucións.
O comité leva anos solicitando á dirección da compañía unha revisión dos horarios, unha petición que, segundo denuncia, foi rexeitada de maneira reiterada con diferentes argumentos. Primeiro foi a pandemia da Covid-19; posteriormente, a suposta falta de persoas usuarias e, máis tarde, o proceso de preparación da nova concesión municipal e un estudo sobre a demanda do servizo e a renovación das liñas que nunca chegou a coñecerse.
Na actualidade, a empresa xustifica a súa negativa a introducir cambios pola paralización do concurso da nova concesión, argumentando que non acometerá modificacións mentres non se saiba quen será a próxima empresa xestora do servizo.
## Atrasos e falta de descansos durante a xornada
Desde o comité advirten de que esta situación está a ter consecuencias directas tanto para o persoal como para as persoas usuarias. O incremento substancial da demanda, que xa supera as cifras anteriores á pandemia, unido á presenza de menos autobuses nas rúas, está a provocar atrasos importantes nas diferentes liñas.
Como consecuencia, os horarios publicados non se corresponden coa realidade do servizo e resultan imposibles de cumprir. Ademais, a representación sindical alerta de que esta situación impide que o persoal dispoña dos descansos mínimos legalmente establecidos durante a xornada laboral.
## Non descartan mobilizacións
A preocupación do comité aumenta ante a proximidade do período de maior intensidade circulatoria en Vigo, coincidindo co acendido das luces de Nadal, unha época na que os problemas de tráfico adoitan agravarse considerablemente.
A representación dos traballadores e traballadoras asegura que solicitou en varias ocasións reunións coa dirección de Vitrasa para abordar estas deficiencias e buscar solucións, pero non obtivo resposta.
Ante a falta de avances e a proximidade dun período especialmente complicado para o transporte urbano, o comité non descarta iniciar mobilizacións para denunciar a situación e reclamar unha actualización dos horarios que permita prestar un servizo adecuado e garantir unhas condicións laborais dignas para o persoal.
