A Laracha. O PSOE da Laracha criticou a decisión do Concello de executar durante o mes de agosto as obras de renovación da cuberta da Piscina Municipal, unha actuación que implicará o peche da zona húmida (piscina e spa) entre os días 10 e 28 de agosto, segundo informou a propia administración local.
Ademais, o complexo deportivo permanecerá totalmente pechado do 10 ao 16 de agosto para realizar traballos de mantemento.
Os socialistas consideran que esta situación prexudica aos usuarios e usuarias das instalacións, xa que, malia non poder facer uso da piscina durante case vinte días, deberán aboar a cota mensual íntegra.
Desde o PSOE pregúntanse se é xusto que a veciñanza continúe pagando o mesmo importe por un servizo que estará parcialmente suspendido durante boa parte do mes. A formación reclama ao Goberno local que valore medidas compensatorias para os abonados, como unha redución proporcional da cota ou outras fórmulas que eviten que os usuarios asuman o custo dun servizo que non poderán utilizar.
Os socialistas sinalan que as obras son necesarias para mellorar as instalacións, pero consideran que a súa planificación debería minimizar o impacto sobre a cidadanía e ir acompañada de medidas que garantan un trato equitativo ás persoas abonadas.
O debate céntrase agora en se o Concello adoptará algunha medida para compensar aos usuarios afectados polo peche temporal das instalacións deportivas.