A Asociación de Veciños O Quinteiro xa ten todo preparado para celebrar unha das festas máis queridas do outono: o *Magosto*, unha xornada pensada para compartir entre xeracións arredor da música, os contos, os xogos e, por suposto, das tradicionais castañas asadas.
O Magosto é unha celebración que vai moito máis alá dunha festa gastronómica. A castaña foi durante séculos un alimento fundamental en Galicia, capaz de alimentar e sacar da fame a xeracións enteiras. Por iso, desde O Quinteiro queren renderlle a homenaxe que merece, recuperando tamén o espírito dunha celebración na que pequenos e maiores se reúnen para gozar xuntos das tradicións.
A programación terá lugar o *sábado 7 de novembro de 2026* no EcoMuseo Forno do Forte, sempre que as condicións meteorolóxicas o permitan, xa que a localización podería sufrir modificacións en función do tempo.
A tarde arrancará ás *17:00 horas cos Xogos de Outono, unha proposta para os máis pequenos da man da profesora Andrea. Ás **18:30 horas* chegará un dos momentos máis especiais da xornada: unha tardiña de contos con *Celso Fernández Sanmartín*, contacontos e poeta cunha particular capacidade para conectar co público e, especialmente, coas persoas maiores.
A súa maneira de contar lévanos a unha Galicia doutros tempos, recuperando historias, lembranzas e vivencias que forman parte da memoria colectiva e que as novas xeracións teñen cada vez máis lonxe. A súa experiencia de dez anos traballando na residencia de maiores de Lalín contribuíu, sen dúbida, a construír esa especial sensibilidade cara ás historias de vida e aos seus protagonistas.
A partir das *19:30 horas*, os asistentes poderán gozar de castañas asadas de balde, nun ambiente festivo e de convivencia. Ademais, haberá servizo de bar durante toda a xornada.
Desde a Asociación de Veciños O Quinteiro animan a toda a veciñanza a participar nesta celebración, unha oportunidade perfecta para compartir tradicións, recuperar lembranzas e desfrutar dunha tarde de outono en boa compañía.
## PROGRAMA | MAGOSTO NO QUINTEIRO
*Sábado, 7 de novembro de 2026*
– *17:00 h.* Xogos de outono con Andrea.
– *18:30 h.* Tardiña de contos con Celso Fernández Sanmartín.
– *19:30 h.* Castañas asadas de balde para todos os asistentes.
– *Durante toda a xornada:* servizo de bar.
*Lugar:* EcoMuseo Forno do Forte (suxeito a posibles cambios en función da meteoroloxía).
