O novo servizo ofrecerá cinco prazas gratuítas de atención diúrna personalizada para persoas maiores de 60 anos
O municipio de Ponteceso contará cunha cuarta Casa do Maior, que nesta ocasión estará situada en Corme. Esta nova incorporación permitirá ampliar os recursos de atención ás persoas maiores da localidade, cun servizo gratuíto destinado a ofrecer atención diúrna personalizada a persoas de máis de 60 anos.
A posta en marcha deste recurso será posible grazas a unha subvención de 53.429,68 euros concedida pola Xunta de Galicia, que permitirá habilitar cinco novas prazas de atención.
Con esta iniciativa, Ponteceso continúa reforzando a súa rede de servizos sociais e de atención á terceira idade, apostando por recursos de proximidade que favorezan o benestar das persoas maiores e lles permitan recibir atención nunha contorna próxima e familiar.
A apertura desta cuarta Casa do Maior supón un novo avance para o municipio, que duplica o número de prazas dispoñibles en menos dun ano, ampliando así a capacidade de atención e o apoio ás persoas maiores e ás súas familias.
A chegada deste servizo a Corme contribuirá a achegar os recursos asistenciais á veciñanza, favorecendo unha atención máis accesible e adaptada ás necesidades das persoas maiores.
