A nova directiva do club presentou propostas para ampliar os espazos en terra e na lámina de auga, así como para impulsar actividades formativas en dependencias portuarias.*
*Santiago de Compostela, 3 de novembro de 2026.*– Portos de Galicia e o Real Club Náutico de Portosín mantiveron unha reunión para analizar diferentes propostas de investimento destinadas á ampliación e mellora das instalacións portuarias e dos servizos que presta a entidade deportiva.
O encontro, celebrado esta mañá na sede de Portos de Galicia, estivo presidido pola responsable do ente público, Natalia Botana, e contou coa participación dos integrantes da nova directiva do club, elixida o pasado verán. Durante a reunión, os representantes da entidade expuxeron os principais eixes do seu proxecto de traballo, centrado no desenvolvemento de novas infraestruturas e na mellora dos servizos actuais.
Entre as iniciativas presentadas destacan a ampliación das superficies dispoñibles tanto na lámina de auga como en terra, co obxectivo de incrementar a capacidade e mellorar as condicións das instalacións. Ademais, abordouse a posibilidade de aproveitar espazos portuarios xa existentes para desenvolver actividades formativas e outros usos complementarios.
Pola súa banda, Natalia Botana trasladou a disposición de Portos de Galicia a colaborar co club no impulso destas actuacións, así como na tramitación dos permisos necesarios para que a entidade poida materializar os investimentos previstos.
Esta reunión enmárcase na vontade de cooperación entre ambas as entidades para favorecer a modernización das instalacións do Náutico de Portosín, reforzar os servizos portuarios e ampliar as posibilidades de actividade deportiva e formativa no porto.
