Veciñanza e usuarios denuncian o deficiente estado das beirarrúas e reclaman ao Concello e á empresa responsable unha actuación urxente
A falta de limpeza e mantemento volve xerar malestar entre a veciñanza de Perillo, no concello de Oleiros. Residentes e usuarios da zona denuncian o estado de abandono que presentan algunhas beirarrúas, así como a situación dunha parada de autobús, que consideran impropia dun espazo de uso diario.
Segundo as queixas trasladadas pola veciñanza, a acumulación de sucidade, vexetación e falta de mantemento dificulta o uso normal das beirarrúas e ofrece unha imaxe de descoido nunha zona na que viven e se desprazan diariamente numerosos veciños.
«Isto tamén é Oleiros. Vivimos e pagamos impostos os habitantes e usuarios destas beirarrúas», sinalan os afectados, que reclaman que os servizos de limpeza e mantemento se realicen con maior frecuencia.
As críticas tamén se dirixen á UTE responsable dos traballos, á que os veciños piden que cumpra coas súas obrigas de conservación e limpeza. «Hai que limpar de vez en cando», reclaman, ante unha situación que, segundo indican, se prolonga no tempo.
A veciñanza considera que o mantemento adecuado das beirarrúas e das paradas de transporte público debería ser unha prioridade, tanto por cuestións de hixiene e seguridade como pola propia imaxe do municipio.
Os usuarios agardan agora que o Concello de Oleiros e a empresa responsable tomen nota das reclamacións e procedan á limpeza e posta a punto da zona, para evitar que o deterioro continúe aumentando.
