
As familias poderán solicitar praza ata o 11 de decembro para participar nas actividades, que se desenvolverán en Rois e Urdilde durante as vacacións de Nadal
O Concello de Rois abrirá o vindeiro 23 de novembro o prazo de inscrición no programa de conciliación familiar DiverNadal 2026-2027, unha iniciativa destinada a facilitar a organización das familias durante as vacacións escolares de Nadal. O servizo desenvolverase nas localidades de Rois e Urdilde entre o 22 de decembro e o 7 de xaneiro, ambos os días incluídos, agás as fins de semana e os festivos.
O programa está dirixido a nenos e nenas escolarizados a partir de 4º de educación infantil e ofrecerá un total de dez xornadas de actividade. As familias poderán escoller os días nos que necesiten o servizo, adaptando así a inscrición ás súas necesidades de conciliación.
O horario ordinario será de 9.30 a 14.30 horas, aínda que tamén existirá a posibilidade de ampliar a atención a través do servizo Amencer, que permitirá deixar os menores desde as 7.30 horas. O prezo será de seis euros por día no horario habitual e de 6,50 euros coa ampliación horaria.
Bonificacións para as familias
O Concello contempla diferentes bonificacións do 15% sobre o prezo da matrícula. Poderán beneficiarse delas as familias que inscriban un segundo irmán ou irmá, aquelas que soliciten a participación durante a totalidade das xornadas ofertadas e as familias numerosas ou monoparentais. Tamén se aplicará este desconto nos casos nos que algún membro de primeiro grao da unidade familiar teña recoñecida unha discapacidade superior ao 33%.
Estas bonificacións non serán acumulables.
Inscrición ata o 11 de decembro
O prazo para presentar as solicitudes permanecerá aberto desde o 23 de novembro ata o 11 de decembro. A tramitación deberá realizarse a través da páxina web municipal, www.rois.gal. As prazas serán limitadas e terán preferencia os menores empadroados no municipio.
Ademais, o proceso de selección dará prioridade ás familias nas que os proxenitores ou representantes legais estean traballando, participen en accións formativas convocadas polo Servizo Público de Emprego ou concorran a procesos selectivos para acceder a unha Administración pública durante o período de funcionamento do programa.
Tamén se terá en conta a situación das familias nas que algún dos proxenitores ou representantes legais teña unha discapacidade igual ou superior ao 65%, deba atender familiares de primeiro grao cun grao de discapacidade equivalente ou teña recoñecida a condición de coidador familiar dunha persoa dependente.
Finalmente, tamén contarán con prioridade as familias usuarias dos Servizos Sociais municipais, sempre que exista un informe técnico que avale a súa situación.
Con esta nova edición do DiverNadal, o Concello de Rois busca ofrecer ás familias un recurso de apoio durante o período non lectivo, ao tempo que facilita que os máis pequenos conten cun espazo de convivencia e actividades durante as vacacións de Nadal.

