A actuación, na parroquia da Pereira, conta cun orzamento de 43.730,30 euros e está incluída no POS+ 2026 adicional
Santa Comba, 7 de outubro de 2026. O Concello de Santa Comba vén de sacar a licitación as obras de mellora da pista que conecta o lugar de Vilar de Arriba coa estrada provincial, na parroquia da Pereira. A actuación conta cun orzamento máximo de licitación de 43.730,30 euros, IVE incluído, e está financiada ao abeiro do POS+ 2026 adicional.
Os traballos permitirán mellorar o estado dunha vía de uso habitual para a veciñanza e forman parte dos proxectos impulsados polo goberno municipal para a renovación e mellora das infraestruturas viarias do concello, con especial atención ás conexións cos núcleos rurais.
Segundo o Concello, este tipo de actuacións teñen como obxectivo facilitar os desprazamentos e reforzar a seguridade viaria, dando resposta ás necesidades das persoas que empregan estas vías a diario para acudir aos seus postos de traballo, aos centros educativos ou aos distintos servizos básicos.
Dez días para presentar ofertas
As empresas interesadas en executar os traballos poderán presentar as súas ofertas desde este xoves, 8 de outubro, ata o sábado 17 de outubro, ambos os días incluídos. O procedemento establece así un prazo de dez días naturais para a presentación da documentación e das propostas.
Unha vez formalizado o contrato e asinada a correspondente acta de comprobación do replanteo, a empresa adxudicataria contará cun prazo de execución de tres meses para completar a actuación.
A mellora da conexión de Vilar de Arriba coa estrada provincial súmase así ao conxunto de investimentos previstos polo Concello de Santa Comba para avanzar na conservación e modernización da rede viaria municipal e mellorar as comunicacións entre os distintos núcleos de poboación.
