A formación reclama explicacións ao Concello e pide que as futuras obras se comuniquen con antelación para evitar prexuízos á veciñanza.
UCIN Boiro denuncia a falta de información previa polo corte da estrada AC-305 ao seu paso polo municipio, que tivo lugar esta mañá por mor dos traballos de asfaltado e provocou longas colas e importantes retencións no tráfico.
Segundo a formación, nin os veciños nin os condutores recibiron avisos con antelación sobre esta actuación, polo que moitas persoas atoparon a estrada cortada ao chegar á zona, sen poder planificar os seus desprazamentos nin coñecer posibles rutas alternativas.
A situación ocasionou atrasos nos desprazamentos laborais, dificultades para levar os nenos e nenas aos centros educativos e problemas para chegar a citas médicas, entre outras consecuencias. UCIN Boiro lembra que a AC-305 é unha vía con moito tránsito e que as actuacións deste tipo poden afectar a un número importante de persoas.
Desde a formación consideran que os traballos de asfaltado deben planificarse e comunicarse con tempo suficiente, facilitando información clara sobre as datas, os horarios e os desvíos habilitados. Neste sentido, cuestionan que non se empregasen os canais de comunicación dispoñibles para informar dunha incidencia que condicionou a mobilidade no municipio.
UCIN Boiro sinala que o Concello dispón de redes sociais e doutros medios de comunicación que utiliza habitualmente e considera que estes recursos tamén deberían servir para trasladar avisos de interese público. A formación sostén que, aínda que o Concello non fose o responsable directo das obras, debería contribuír a informar a cidadanía; e que, de ser o responsable da actuación, a ausencia de comunicación previa sería aínda máis grave.
«Non cuestionamos que se asfalte, porque é necesario, senón que se faga ás costas dos veciños», sinala o coordinador de UCIN Boiro. «Informar é unha obriga básica, e máis cando existen ferramentas para facelo de maneira inmediata e gratuíta».
Por todo isto, UCIN Boiro esixe que se expliquen os motivos polos que non se informou previamente do corte da AC-305 e reclama que, en futuras obras en vías principais, se comuniquen as afeccións con suficiente antelación a través de todos os canais dispoñibles.
A formación tamén pide que se instale sinalización suficiente na propia estrada, de maneira que os condutores poidan coñecer as restricións de circulación e optar por itinerarios alternativos antes de chegar ao punto afectado.
