UCIN Boiro denuncia os recortes de Monbus entre Ribeira e Santiago e chama os usuarios a reclamar masivamente

A organización critica a supresión de paradas e horarios, o transbordo obrigado para os veciños de Escarabote e a eliminación do servizo de regreso das 14.00 horas.

Boiro, 18 de novembro de 2026.– UCIN Boiro denunciou os cambios introducidos por Monbus nas conexións de autobús entre Ribeira e Santiago de Compostela, ao considerar que están a prexudicar directamente os veciños que dependen do transporte público para desprazarse diariamente aos seus postos de traballo, centros educativos ou consultas médicas.

A formación política considera que a redución de servizos, a eliminación de paradas e a modificación dos horarios están a provocar importantes dificultades aos usuarios habituais, especialmente a aqueles que utilizan o autobús como medio de transporte imprescindible.

Segundo denuncia UCIN, os novos servizos directos entre Ribeira e Santiago realizan unicamente catro paradas, deixando sen cobertura a numerosos usuarios que ata agora contaban con conexións intermedias.

Unha das localidades máis afectadas é Escarabote, cuxos veciños perderon a conexión directa con Santiago e vense obrigados a realizar un transbordo en Boiro. Ademais, deben agardar polo seguinte autobús na parada de Cimadevila, despois do traslado da anterior localización, situada nas proximidades do Concello.

A organización considera que esta modificación supón un novo obstáculo para os usuarios, ao incrementar os tempos de espera e dificultar os desprazamentos, especialmente para persoas maiores e veciños que necesitan acudir a citas médicas ou cumprir horarios laborais.

A eliminación do autobús das 14.00 horas, outro dos principais problemas

A situación tamén afecta aos desprazamentos de volta. UCIN Boiro denuncia a supresión do servizo das 14.00 horas, que foi substituído por unha saída ás 15.15 horas. Este novo percorrido inclúe paradas nos hospitais, o que prolonga a duración da viaxe para aqueles usuarios que simplemente necesitan regresar aos seus fogares.

«Quen decide estes cambios non colle o autobús todos os días. Nós si, e sabemos o que supón perder unha hora en cada viaxe. O transporte público ten que estar ao servizo dos veciños, non ao revés», manifestou Miguel Piqueras, coordinador de UCIN Boiro.

Ante esta situación, a formación reclama a Monbus e á Xunta de Galicia que revisen as modificacións realizadas e recuperen os horarios, as paradas e as conexións suprimidas. Tamén pide aos concellos afectados que abandonen a pasividade e defendan os intereses dos seus veciños ante as administracións competentes.

Así mesmo, UCIN considera imprescindible escoitar os usuarios habituais antes de introducir cambios que afecten á mobilidade da cidadanía.

UCIN chama a presentar reclamacións ante a Xunta, Monbus e os concellos

Para conseguir que o problema sexa atendido, UCIN Boiro anima todos os veciños afectados a presentar reclamacións formais a través das seguintes vías:

  • Xunta de Galicia: mediante a súa sede electrónica, utilizando o procedemento de solicitude xenérica PR004A.
  • Monbus: a través das súas canles de atención ao cliente.
  • Concello correspondente: mediante a presentación dunha queixa por rexistro oficial, para que os gobernos locais tamén trasladen formalmente o malestar dos usuarios.

A organización insiste en que a participación cidadá é fundamental para conseguir unha resposta das administracións e da empresa concesionaria, e considera que a acumulación de reclamacións pode contribuír a visibilizar o alcance do problema.

«Cantas máis reclamacións, máis difícil será ignorarnos. Non podemos deixar que pisen os dereitos dos veciños», concluíu Miguel Piqueras.

Desde UCIN Boiro reiteran que o transporte público debe garantir conexións útiles, accesibles e adaptadas ás necesidades reais da poboación, e non converterse nunha dificultade engadida para quen non dispón doutras alternativas de desprazamento.