José Luis Calo reclama a publicación de toda a documentación e unha comparecencia pública do alcalde
Ames, 7 de setembro de 2026. – Unión de Ciudadanos Independientes (UCIN) Galicia reclamou ao Concello de Ames «transparencia absoluta» na tramitación do novo aparcadoiro subterráneo de pago do Milladoiro e solicitou que toda a documentación relacionada co proxecto sexa posta á disposición dos grupos municipais e da cidadanía.
O coordinador de UCIN Galicia, José Luis Calo, cualificou de «inaceptable» a maneira na que, ao seu xuízo, se está xestionando o proxecto e considerou que o caso evidencia «unha forma de facer política baseada nos feitos consumados, na falta de información e nunha preocupante ausencia de transparencia».
«Blas García e o seu Goberno non poden pretender que os veciños acepten agora un aparcadoiro de pago sen coñecer con claridade canto vai custar, quen o vai xestionar, cales serán as tarifas e en que condicións se vai prestar o servizo», afirmou Calo.
Desde UCIN Galicia tamén consideran especialmente relevante que membros da oposición teñan denunciado dificultades para acceder á documentación do proxecto. Segundo a formación, se foi necesario presentar reiteradamente solicitudes para obter documentación como o estudo de viabilidade, a situación debería ser explicada publicamente.
UCIN reclama explicacións a toda a Corporación
A formación independente asegura que as responsabilidades políticas non deben limitarse ao Goberno municipal e reclama explicacións ao conxunto da Corporación.
«Aquí non só ten que responder o alcalde. Toda a Corporación debe explicar que fixo, que sabía, que votou e que posición mantivo durante a tramitación deste proxecto», sinalou Calo.
UCIN Galicia apunta tamén á actuación do Partido Popular na oposición e lembra que existen documentos municipais nos que aparecen intervencións dos grupos da oposición e votacións nas que os populares apoiaron acordos promovidos polo Goberno socialista.
Neste sentido, Calo considera que o PP «non pode presentarse agora como se levase anos completamente alleo ás decisións desta Corporación» e reclama que explique «que control exerceu e por que non levantou antes a voz» se considera que existiron deficiencias na xestión do proxecto.
Tarifas, custos e modelo de xestión
Para UCIN Galicia, unha das cuestións fundamentais é coñecer en detalle as condicións económicas e administrativas do futuro aparcadoiro, ao tratarse dun servizo polo que terán que pagar os usuarios.
A formación reclama información sobre as tarifas, horarios, custos, modelo de xestión, contrato, duración, investimentos, previsión de ingresos e posible repercusión económica para as arcas municipais.
«A transparencia non pode consistir en entregar documentos cando xa non hai capacidade real de debate. Transparencia é informar antes de decidir, non despois», defendeu o coordinador de UCIN Galicia.
A formación considera que o proxecto debe someterse ao coñecemento da cidadanía antes da súa posta en funcionamento e reclama que a documentación completa sexa publicada.
Solicitan unha comparecencia pública e un debate plenario
UCIN Galicia enmarca a polémica nun problema político máis amplo en Ames, ao considerar que existe, segundo a súa valoración, «un Goberno que non informa suficientemente e unha oposición que parece reaccionar tarde e a remolque dos acontecementos».
«Os veciños de Ames pagan os seus impostos e teñen dereito a saber que fan co seu diñeiro. Non queremos máis xogos partidistas, nin fotografías, nin comunicados cruzados. Queremos expedientes enriba da mesa, contas claras e responsabilidades políticas», afirmou Calo.
Finalmente, UCIN Galicia reclamou unha comparecencia pública do alcalde, Blas García, e a celebración dun debate plenario específico sobre o proxecto, coa documentación completa a disposición dos grupos municipais e da cidadanía.
«Se o Goberno de Blas García non ten nada que ocultar, que publique inmediatamente toda a documentación. E se a oposición sabía o que estaba pasando, que explique tamén por que non actuou antes», concluíu Calo.
