UCIN Galicia lanzou un serio aviso sobre a situación crítica que atravesa o sector lácteo, cualificando de “golpe histórico” a caída de ingresos que afecta ás explotacións de vacún de leite. O coordinador da formación, José Luis Calo, advertiu de que esta situación pon en risco un dos piares económicos e sociais de Galicia.
Segundo datos trasladados por organizacións agrarias, as granxas galegas afrontan unha perda superior aos 186 millóns de euros debido á baixada media de 8 céntimos por litro nos novos contratos lácteos. Nunha explotación tipo, isto pode supoñer perdas anuais próximas aos 27.000 euros. A maiores, o incremento dos custos de produción —especialmente en gasóleo, fertilizantes e servizos agrarios— está a agravar a situación.
Desde UCIN Galicia denuncian que esta combinación está a “afogar literalmente ás explotacións familiares”, deixando ao sector en desvantaxe fronte a outros territorios como Asturias, onde os prezos do leite poden ser ata un 24% máis elevados.
Calo subliñou que “non se pode permitir que un sector estratéxico, que fixa poboación no rural e xera miles de empregos, sexa tratado como unha variable de axuste polas industrias lácteas”. Neste contexto, reclama unha resposta “inmediata e contundente” das administracións públicas.
Outro dos factores que preocupa á organización é a entrada de leite a baixo custo procedente de Francia e Portugal, o que —segundo denuncian— está a distorsionar o mercado e presionar os prezos á baixa.
UCIN Galicia tamén pide investigar posibles prácticas irregulares no sector. “Se existen comportamentos propios dun cártel, estaríamos ante feitos moi graves que deben ser sancionados con contundencia”, afirmou Calo.
Finalmente, a formación fai un chamamento á Xunta de Galicia, ao Ministerio de Agricultura e aos organismos reguladores para que garantan o cumprimento da Lei da Cadea Alimentaria e protexan aos produtores. Ao mesmo tempo, instan á cidadanía a apostar polo consumo de leite e produtos lácteos de orixe galega.
“Detrás de cada litro de leite hai familias, emprego e futuro para o noso rural. Defender o sector lácteo é defender Galicia”, concluíu José Luis Calo.
